11-12 dəq. oxuma vaxtı
Yeniliklər 
Türkiyədə təhsil alan Azərbaycanlı və Türkiyəli gənclər bir araya gələrək yeni bir layihəyə imza atıblar. Belə ki, Türkiyənin ən prestijli və köklü tədris müəssisələrindən olan Robert College-də təhsil alan azərbaycanlı parlaq gənc, yerli və beynəlxalq olimpiadaların qalibi Şəms Müslümovun ideya müəllifi olduğu layihə ilə məktəblilərin gələcək təhsil və karyera yoluna töhfə verilməsi hədəflənir. Layihənin təşkilat komitəsində yer alan Bora Ramazanbeyoğlu Robert College, Eltaj Pənahlı Koç Universiteti, Emin Aslanov Sainte Pulchérie Fransız Litseyi, Göktürk İşcan isə Hacettepe Universiteti tələbələri olaraq Türkiyənin ən qabaqcıl məktəblərindən gəlirlər. Təşkilati komanda “Məqsədimiz yalnız riyaziyyat və İT-nin sonsuz dünyasına baxış təqdim etmək deyil, həm də dünyaya və öz cəmiyyətlərinə möhtəşəm müsbət təsir edəcək, şüurlu, bilikli və özünə inanan parlaq şəxslər yetişdirməkdir,” deyir. Bu məqsədlə hazırladıqları sosial layihə təklifi ilə ölkəmizin innovativ və aparıcı tədris müəssisəsi Code Academy ilə görüşən gənclər, Akademiyanın iştirakı və təşkilati dəstəyilə neft sektorunda çalışan ailələrin övladları üçün iki həftəlik bootcamp (tam zamanlı düşərgə) modeli əsasında IT və riyaziyyat sahələrini tədris edəcək və daha sonra onların gələcək karyera yoluna işıq tutacaq mentorluq fəaliyyətini həyata keçirəcəklər.
“GələcəkdəSƏN” adı altında icra olunan layihənin əsas məqsədi qara qızılla dövrümüzün ağ qızılını yəni, bilik və bacarıqları ilə seçilən yeni nəsli – insan kapitalını birləşdirməkdir. Ənənəvi metodlarla hasilatı aparılan neft sənayəsində gələcəkdə yeni yüksək texnologiyaların tətbiqi qaçılmazdır. Məhz buna görə də, İT və riyazi biliklərə yiyələnmiş gələcək peşəkarların yetişdirilməsi bu layihənin əsas məqsədlər içərisindədir. Pilot olaraq keçirilən layihənin ilk ilində Balaxanı-Suraxanı-Ramanı neft yataqlarında çalışan şəxslərin övladları – 16 nəfər məktəbli seçilərək layihədə iştirak hüququ qazanıblar. Bu sahədə çalışan şəxslərin peşə və idaraetmə bacarıqlarının inkişafı üçün təlimlər təşkil edən Hermes Academy isə həm layihəyə maliyə dəstəyi göstərmiş, həm də layihə iştirakçılarının seçilməsində və onların cəlb olunmasını təşkil etmişdir.
Layihə çərçivəsində məntiq və riyaziyyat üzrə test imtahanından ən yüksək nəticə göstərərək seçilmiş şagirdlər 16-30 avqust tarixlərində Code Academy tədris müəssisəsində keçiriləcək təlimlərdə iştirak edəcək və layihə sonrası layihə komandası və sahənin ekspertləri tərəfindən mentorluq dəstəyindən faydalanacaqlar.