8-9 dəq. oxuma vaxtı
Əgər qrafik dizayn sahəsinə yeni başlamağı düşünürsənsə və ya artıq peşəkar olaraq bu istiqamətdə çalışırsansa, səni maraqlandıran əsas mövzulardan biri bu sahənin real gəlir potensialıdır. Qrafik dizayn bu gün təkcə kreativ bacarıq deyil, düzgün mövqeləndirmə və ixtisaslaşma ilə qlobal səviyyədə yüksək gəlir gətirən bir karyeraya çevrilə bilər.
ABŞ Əmək Statistikası Bürosunun (BLS) məlumatlarına görə, qrafik dizaynerlərin orta illik gəliri təqribi olaraq 61,300 ABŞ dolları təşkil edir. Lakin bu rəqəm yalnız ümumi göstəricidir. Real qazanc təcrübə, ixtisas, sənaye və iş modelinə görə dəyişir.
Qrafik dizaynerlər harada çalışır?
Bir çox dizayner şirkət daxilində çalışaraq sabit maaş və sosial paketlər əldə edir. Digərləri dizayn və reklam agentliklərində müxtəlif layihələr üzərində işləyir. Lakin son illərdə ən çox diqqət çəkən modellər freelance və remote iş formalarıdır.
Freelance dizaynerlər eyni anda bir neçə müştəri ilə işləyir və qazanc birbaşa onların qiymət strategiyasından və ixtisaslaşmasından asılı olur. Gəlir dəyişkən olsa da, bu model dizaynerə limitsiz qazanc potensialı təqdim edir.
Remote dizaynerlər isə fiziki olaraq harada yaşamasından asılı olmayaraq, xarici şirkətlər və qlobal komandalar üçün çalışır. Bu model lokal bazar məhdudiyyətlərini aradan qaldırır və dizaynerlərə daha yüksək ödənişli işlərə çıxış imkanı verir.
Marketinq komandasında çalışan qrafik dizaynerlər
Marketinq komandasında çalışan qrafik dizaynerlər adətən bir şirkətin daxili dizayn ehtiyaclarını qarşılayır və tək bir brend üzərində fokuslanırlar. Bu qrafik dizaynerə stabil iş mühiti və sabit gəlir təqdim edir.
Qlobal bazarda marketinq komandasında dizaynerlərin illik gəliri orta hesabla təqribi 55,000 – 85,000 ABŞ dolları aralığındadır. Azərbaycan bazarında isə bu rəqəmlər illik olaraq təqribi belədir:
- Junior: 11,300 – 17,000 AZN
- Middle: 17,000 – 25,500 AZN
- Senior: 25,500 – 35,400 AZN
- Lead / Head of Design: 35,400 – 49,500 AZN+
Bu sabitlik baxımından üstün olsa da, gəlirin yuxarı limiti çox vaxt mövcud olur və maaş artımı vəzifə yüksəlişindən asılıdır.
Agentlikdə çalışan qrafik dizaynerlər
Reklam və kreativ agentliklərdə çalışan dizaynerlər eyni vaxtda bir neçə fərqli müştəri və sektor üçün işləyə bilirlər. Bu mühit dizaynerə sürətli təcrübə qazandırır və portfolionun tez böyüməsinə şərait yaradır.
Qlobal bazarda agentlik dizaynerlərinin illik gəliri 58,000 – 95,000 ABŞ dolları aralığında dəyişir. Azərbaycan bazarında isə təqribi:
- Junior: 9,900 – 15,600 AZN
- Middle: 15,600 – 24,100 AZN
- Senior: 24,100 – 34,000 AZN
- Art / Creative Director: 35,400 – 56,600 AZN+ olaraq dəyişir.
Agentliklərdə iş tempi yüksək olsa da, bu model çox vaxt dizaynerlər üçün freelance və remote bazara keçid üçün güclü baza yaradır.
Freelance qrafik dizaynerlər necə qazanır?
Freelance dizaynerlər müstəqil şəkildə çalışır, müştərilərini və qiymətlərini özləri müəyyən edirlər.
Qlobal bazarda freelance dizaynerlərin saatlıq qiymətləri ortalama olaraq 50 – 150 ABŞ dolları aralığında dəyişir. Azərbaycan bazarında isə bu rəqəmlər daha aşağıdır:
- Saatlıq: 10 – 70 AZN
- Logo dizayn: 300 – 1,000 AZN
- Brand identity: 1,000 – 3,000 AZN
Stabil müştəri bazası olan freelance dizaynerlər yerli bazarda qazancı təqribi olaraq 1,500 – 3,000 AZN, qlobal müştərilərlə isə daha ola bilir.
Remote çalışan qrafik dizaynerlər: ən yüksək gəlir potensialı
Remote dizaynerlər fiziki olaraq Azərbaycanda yaşayıb, xarici şirkətlər və beynəlxalq komandalar üçün çalışırlar. Bu model lokal bazar məhdudiyyətlərini aradan qaldırır və dizaynerə daha yüksək maaşlı işlərə çıxış imkanı verir.
Qlobal bazarda remote dizaynerlərin illik gəliri ortalama 70,000 – 120,000 ABŞ dolları, bəzən daha yüksək olur. Azərbaycan üçün bu, illik olaraq təxminən:
- Junior remote: 21,200 – 35,400 AZN
- Middle remote: 35,400 – 56,600 AZN
- Senior / remote: 56,600 – 99,100 AZN+
Remote model yüksək məsuliyyət və güclü kommunikasiya bacarığı tələb etsə də, ən yüksək gəlir potensialına malik model hesab olunur. Qeyd edək ki, qeyd olunan qiymət aralığı görülən işlərdən və müştəridən asılı olaraq dəyişir.
Gəlirə təsir edən əsas faktorlar
Qrafik dizaynerin qazancı bir neçə əsas faktordan asılıdır. Təhsil müəyyən üstünlük yaratsa da, xüsusilə başlanğıc mərhələdə portfolio və real iş nümunələri daha həlledici rol oynayır. Təcrübə isə maaşa ən çox təsir edən faktordur. Hər il artan məsuliyyət və səlahiyyətlər gəliri də yüksəldir.
Bundan əlavə, dizaynerin çalışdığı sənaye də çox önəmlidir. Texnologiya şirkətlərində çalışan dizaynerlər adətən ən yüksək gəlir əldə edir (65,000–110,000 $). Reklam agentlikləri və marketinq yönümlü şirkətlər orta-yüksək səviyyədə gəlir təklif edir. UI/UX üzrə ixtisaslaşmış dizaynerlər isə ənənəvi qrafik dizaynerlərə nisbətən 20–30% daha çox qazanır.
Remote və freelance işlərin yüksəlişi
Bu gün qrafik dizaynerlərin təxminən 97%-i ən azı qismən remote işləyir. Şirkətlər artıq dizaynerləri yalnız böyük şəhərlərdən axtarmır, bu da qlobal istedad bazarını genişləndirir.
Eyni zamanda, bir çox şirkət tam-ştat dizayner yerinə layihəəsaslı və freelance əməkdaşlığa üstünlük verir.
Süni intellekt və yeni bacarıqların rolu
Bir çox AI (Süni İntellekt) alətləri artıq dizayn prosesinin bir hissəsidir. Lakin bu alətlər dizaynerləri əvəz etmir, əksinə, onları daha sürətli və effektiv edir. AI alətlərini düzgün istifadə edən dizaynerlər bazarda daha çox tələb görür və daha yüksək qiymət qoya bilir.
Bu səbəbdən davamlı öyrənmə artıq seçim deyil, zərurətdir. Dizaynerlər yeni alətlər, UX prinsipləri və komanda ilə işləmə bacarıqlarını daim inkişaf etdirməlidir.
Sahədəki əsas çətinliklər
Qrafik dizayn sahəsində başlanğıc səviyyədə rəqabət çox yüksəkdir. Eyni zamanda bəzi şirkətlər dizaynı hələ də xərc kimi görür. Freelance dizaynerlər üçün isə müştərilərə dizaynın biznes dəyərini izah etmək ayrıca bacarıq tələb edir.
5-6 dəq. oxuma vaxtı
