5-6 dəq. oxuma vaxtı
Digital transformasiya dövründə IT Biznes Analitik peşəsi şirkətlər üçün strateji əhəmiyyət daşıyan əsas rollardan birinə çevrilib. Texnologiya ilə biznes arasında körpü rolunu oynayan bu mütəxəssislər təkcə tələbləri toplamaqla kifayətlənmir, həm də düzgün analiz, strukturlaşdırılmış yanaşma və obyektiv qərarvermə mühitinin formalaşmasına da töhfə verirlər.
Code Academy-də IT Biznes Analitik tədrisi zamanı bu peşənin əsas prinsipləri real iş mühiti üzərindən öyrədilir. Sahədə uzun illər təcrübəyə malik olan Novruz müəllimin tövsiyələri isə bu yolda olan hər kəs üçün dəyərli yol xəritəsi rolunu oynayır. Gəlin, IT Biznes Analitik olmaq istəyənlər üçün ən vacib 5 tövsiyə ilə tanış olaq.
1. Qeyri-müəyyən ifadələrdən uzaq durun
Biznes Analitik üçün ən təhlükəli məqam qeyri-müəyyənlikdir. “Çox vacibdir”, “çox aşağıdır”, “bəlkə artırmaq olar” kimi ifadələr nə biznes, nə də texniki komanda üçün aydınlıq yaradır.
Peşəkar IT Biznes Analitik faktlarla danışır. Rəqəmlər, ölçülə bilən göstəricilər (KPI), konkret məlumatlar və dəqiq təsvirlər analitikin əsas iş alətləridir. Məsələn, “performans zəifdir” demək əvəzinə, “sistem cavab müddəti 3 saniyədən 7 saniyəyə yüksəlib” demək həm problemi dəqiq göstərir, həm də həll üçün sağlam baza yaradır.
Code Academy-də keçirilən praktiki dərslərdə tələbələrə bu analitik düşüncə tərzi xüsusi olaraq aşılanır.
2. Emosional ton işlətməyin
Biznes Analitik emosiyalarla deyil, obyektiv analizlə danışmalıdır. “Yaxşı olardı ki…”, “aydındır ki…”, “mütləq uğursuz olacaq” kimi ifadələr şəxsi fikir və emosional yanaşma yaradır.
Analitik kommunikasiya neytral, faktlara əsaslanan və sübutlu olmalıdır. Bu yanaşma həm etibarlılığı artırır, həm də qərar verən şəxslər üçün sağlam qiymətləndirmə mühiti yaradır. IT Biznes Analitik rolunda əsas məqsəd emosiyanı deyil, məlumatı ötürməkdir.
3. Qərar verməyin, qərarverməyə dəstək olun
IT Biznes Analitik qərar verən şəxs deyil, qərarvermə prosesini gücləndirən tərəfdir. “Bu belə olsun” demək analitikin funksiyasına uyğun deyil.
Əvəzində:
- “Analiz göstərir ki…”
- “Bu variant daha az risklidir…”
- “Məlumatlara əsasən tövsiyə olunur ki…”
kimi ifadələrdən istifadə olunmalıdır. Bu cür yanaşma biznes rəhbərlərinə və məhsul sahiblərinə məlumatlı və əsaslandırılmış qərarlar verməyə imkan yaradır.
4. Gələcəyi proqnozlaşdıran qeyri-dəqiq cümlələr qurmayın
“Ediləcək”, “olunacaq”, “mütləq nəticə verəcək” kimi ifadələr risklidir. Biznes Analitik gələcəyi təxmin etmir, mövcud vəziyyəti analiz edir.
Doğru yanaşma faktlar, ehtimallar və risklər üzərindən qurulur. Məsələn, “Bu dəyişiklik istifadəçi itkisinə səbəb olacaq” demək əvəzinə, “Mövcud dataya əsasən istifadəçi itkisi riski mövcuddur” demək daha peşəkar yanaşmadır.
5. Sualları 3 istiqamətdə verin: Clarify, Enlist, Demonstrate
Doğru sual vermək IT Biznes Analitikin ən güclü bacarıqlarındandır. Novruz müəllimin tövsiyə etdiyi bu model analitik düşüncəni sistemləşdirir:
Clarify (Aydınlaşdırın):
“Bu prosesdə hansı istisnalar mövcuddur?”
Enlist (Sadalayın):
“Hazırda istifadə etdiyiniz bütün sistemləri sadalaya bilərsinizmi?”
Demonstrate (Təsvir edin):
“Bu prosesi addım-addım necə icra etdiyinizi göstərə bilərsinizmi?”
Bu yanaşma tələblərin daha dəqiq toplanmasına və yanlış anlaşılmaların qarşısının alınmasına kömək edir.
IT Biznes Analitik olmaq texniki biliklə yanaşı, analitik düşüncə, düzgün kommunikasiya və obyektiv yanaşma tələb edir. Code Academy-də təqdim olunan IT Biznes Analitik tədris proqramı bu bacarıqları real layihələr və praktik nümunələr üzərindən formalaşdırır.
6-7 dəq. oxuma vaxtı
